30.05.09 0:15a.m.

我, 真係失憶, 成日唔記得嘢, 連24/5去咗上堂學動物傳心術, 都要成個禮拜先記得要寫底, 好有問題o

其實我之前已經報咗一個自學班, 導師定期電郵筆記俾我地自學, 有疑問喺facebook發問同分享, 但係我由1/5開始, 2個禮拜內收到30張筆記, 睇到而家, 都係睇咗十幾頁, 我都係嗰種又多心又唔自律嘅人, 直頭作死o

我一直都想學, 但係早幾年冇咁普及同比較貴, 而家係一個我可以承擔嘅價錢, 學咗亦都可以了解動物多啲, 我太愛佢地, 好想了解佢地o 我冇懷疑過自己會學唔到, 我只係需要人指導我點做, 教個方法俾我o

24/5嗰日, 堂上有兩個導師, 一個係心靈治療師, 一個係動物傳心導師, 佢地俾我嘅感覺係好專業同認真o 嗰堂一共上7個鐘堂, 班上有10個學生, 由開始, 都只係得我唔成功, 但係我仍係相信我得o 一直氣氛都好好, 但係由中途我就開始頭痛, 每次要合埋對眼, 我就覺得個後腦位置好重, 好似有嘢壓住我咁, 張開眼會好啲, 後來我直頭集中唔到, 唔可以繼續o

後來個心靈導師同我入咗一間房, 佢獨立同我做治療, 可能係我太主觀, 始終感覺唔到心靈上有咩好轉, 不過我都覺得好底, 因為做一次心靈治療都唔平o 其實入咗間房我已經好咗啲, 因為入面冇咁光, 同離開咗其他人, 磁場冇咁影響我, 但係一入返去我個頭又再痛o

之後最尾部份, 動物轉心導師, 佢又捉咗我入房個別輔導, 真係底到爛, 因為佢話知道我係有睇到影像, 不過冇講出嚟, 咁喺佢引導下, 我終於講得到我見到嘅嘢, 當時有少少成功感, 但係其實我腦裡面成日都有啲好奇怪嘅影像, 當時上堂嗰啲同我平時見到嘅好似, 我真係分唔到o 但係我又有啲陰謀論, 唔知影像會唔會係導師投射俾我, 等我冇咁挫敗同都有張初級證書, 不過希望唔會係o 其實同導師入咗房, 我個頭又冇咁痛, 可以集中得好啲, 我真係好懷疑上堂中段吸引咗其他磁場, 令到課堂上嘅磁場係改變咗, 因為放學後我又冇事o

我之後一直冇再試, 因為我專心唔到, 但係我好有興趣再上中班, 不過希望上中班之前, 可以就到時間上改進班, 因為會得幾個人, 導師可以慢慢調整我地嘅問題o 搵日再講吓當日上堂時嘅小趣事, 我覺得好得意, 下次再分享o